Entrevista Elsa Rozendal​​

Elsa Rozendal​

Elsa Maria Antonia Rozendal, nase 11 di sèptèmber 1973 na Ulanda, tin dos ruman muhé mas i nan ta bini di mayornan yu di Kòrsou. Su tata ta e konosido Sylvius ‘Boy’ Rozendal q.e.p.d. kende a fungi entre otro komo minister plenipotensiario na Ulanda i tambe komo promé minister di Antia den e periodo 1977 – 1979. Teniendo kuenta ku e funshonnan polítiko di su tata, pa kua hopi bia e no por tabata na kas, su mama tabatin e parti primordial di edukashon na kas. Sinembargo kada momentu ku su tata tabata presente el a pèrkurá di duna su famia tur atenshon. Elsa ta kontando su historia i e ta haña un sonrisa grandi; ‘mi ta kòrda bon kla kon kada bia ku mi rumannan òf ami bisa ku nos ta malu, nos tata tabata bini ku chukulati. Esta dushi esei tabata! Kisas nos tabata deseá di ta malu algun bia djis pa e trese chukulati òf preimu chines loke tambe mi tabata gusta hopi na mucha”. 

Elsa ta bini di un famia polítiko, tantu di parti di su mama komo di parti di su tata a surgi vários polítiko eksitoso manera Frank Rozendal i Abel Arrindell q.e.p.d. Gran parti di su hubentut Elsa a pas’e na Kòrsou. Na 1992 Elsa a partisipá na elekshon di Miss Kòrsou i a keda koroná komo e muhé di mas bunita na Kòrsou. Na 1993 el a partisipá na Miss Universe ku a tuma lugá na México. Despues di e desaroyo aki a kuminsá un otro parti sumamente interesante den e bida di Elsa. El a biaha pa Ulanda pa studia i a gradua komo dosente di idioma segundo grado, spesialisá den spañó i ingles. Bèk na Kòrsou el a traha 5 aña komo dosente di idioma na Marnix College. Un hòbi ku for di chikí Elsa tabatin tabata pa traha asesorio pa su pòpchinan kua el a kontinuá kuné den forma di trahamentu di asesorio pa hende muhé. El a kombertí su hòbi den un negoshi, pues na edat relativamente hóben el a kuminsá hasi negoshi banda di su trabou komo dosente. 

Na 2012 Elsa Rozendal a djòin polítika i a forma parti di Partido pa Adelanto I Inovashon Sosial (PAIS) i for di e momentu ei el a partisipá na tres elekshon, drentando Parlamento na 2016. Aparte di ta parlamentario Elsa Rozendal a dediká hopi atenshon na aspektonan sosial importante pa nos poblashon. Ta den e kuadro ei el a inisiá e página ‘Kòrsou tin Trabou’ riba ret sosial pa informá esnan ku ta buskando trabou di vakaturanan ku habri. Tambe e ta duna kurso ku teps i konseho kon pa hinka un bon karta di solisitut den otro. Tur esaki ku e ophetivo pa empoderá nos hendenan. Durante di ‘lockdown’ Elsa a kuminsá ku e plataforma ‘Un man pa nos lanta bèk’. 

Pa Elsa Rozendal e echo ku si e ta forma parti di un koalishon, no ta kita ku e ta hopi krítiko riba su ministernan. El a presentá dos inisiativa di lei ku ta esun pa traha flèksibel (flexibel werken) i tambe e lei di inisiativa pa hisa kastigu pa esnan ku kometé maltrato den serkania di mucha menor di edat. Banda di esakinan, Elsa ta boga entre otro pa e lei di paternidat, ku SEDA a kuminsá kuné 7 aña pasá, drenta na vigor. Ku e lei aki na vigor kada mama lo por ‘òp’ nan yu na Kranshi i bisa ken ta tata di nan yu. 

Elsa Rozendal ta gusta traha den tim i empoderá otronan. E ta un persona organisá i hopi konsistente ku un gran abilidat di analisá i wak kosnan krítiko.

Send a Message to the Candidate

    Sponsored by