Entrevista Eugene Rhuggenaath

Eugene Rhuggenaath​

Eugene Rhugennaath a kuminsa su karera komo miembro di Konseho Insular di Kòrsou na aña 2003. Ela sigui progresá den su karera polítiko i djis despues a bira Diputado di Finansas na dos okashon i despues Diputado di Ekonomia, Turismo i Labor. Despues di a traha 6 aña den sektor komersial, na Novèmber 2015 ela aseptá e yamada pa sirbi su pais komo Minister di Desaroyo Ekonómiko. Na Aprel 2017, Eugene Rhuggenaath a keda elegí komo Minister-Presidènt i a asumí e puesto ku hopi orguyo i dedikashon.

Eugene Rhuggenaath a studia Business Administration na University of Miami i a kompletá su MBA/MBI na Erasmus University Rotterdam School of Management na Hulanda. Komo ‘Senior business executive’, ‘Director of Operations’ and ‘Managing Director’, ela atkerí eksperiensia den posishonnan di liderasgo, kaminda su afan semper tabata pa logra resultado pa e organisashon dor di fasilitá sinergia i kolaborashon.

For di un edat yòn, e tabata embolbí den komunidat i den organisashonnan ku tin desaroyo di Kòrsou komo meta. E tabata pa largu tempu miembro aktivo di ‘Junior Chamber International’ (JCI), e moveshon di hóbennan profeshonal ku tin komo meta: hasi un impakto positivo den komunidat. Esaki tambe a inspirá su embolbimentu polítiko. Su motivashon ta dirigí riba inovashon, desaroyo sostenibel i kon pa avansá bienestar i felisidat general dor di realisashon di e potensial di kada individuo i di pais.

Komo Minister Presidènt, Eugene Rhuggenaath a liderá un koalishon durante un temporada kaminda Kòrsou a enfrentá diferente krísis i retonan sumamente grandi. Entre otro un krísis finansiero-ekonómiko, impakto di krisis na Venezuela riba diferente sektor, prinsipalmente sektor petrolero, i tambe e pandemia di Covid-19 riba tur area di bida. Sinembargo, no opstante momentunan i desishonnan sumamente difísil, su kompromiso for di komienso di su gobernashon tabata fihá riba garantisá komunidat un gobièrnu stabil ku ta traha pa drecha nos fundeshi ku bista riba futuro i ku ta kapas di tuma desishonnan i inisiá reformanan nesesario, p’asina krea un base fuerte pa realisá desaroyo duradero di nos pais i progreso pa nos komunidat.

Un bista global di algun di meta realisá bou di Gabinete Rhuggenaath:

Desaroyo ekonómiko i infrastruktura: liderá tim interministerial di invershon ‘Un Kòrsou Prospero’ ku a katalisá proyektonan di invershonnan públiko na Zakito, Rif i invershonnan privá den turismo, sentro di suidat, desaroyo di haf i otro, manera Corendon, Courtyard Marriott, Coral Cliff Sta. Martha, The Wharf, Plaza i i diferente trayekto mas ku lo sòru pa miles kupo di trabou i mas desaroyo awor i den futuro.

Desaroyo i invershonnan sosial: invershonnan den infrastruktura di bario, inkluso kloaka, fasilidatnan multifunshonal i deportivo na Nieuw Nederland, Sapaté, Kortijn, Mundu Nobo, Juan Domingo, Koral specht. Proyekto “Quick Fixes” pa drecha kasnan di famia den mal estado, tereno pa traha kas pa mas ku 1000 famia di tur gremio otorgá òf den kontrukshon (i mas pendiente, inkluso Wechi). Ademas, a duna sosten na persona i gruponan vulnerabel den forma di sosten material, diferente kurso i guia den kuadro di agenda pa desaroyo sosial.

Enseñansa, Kultura i Deporte: A inisiá ‘4-landen overleg’ pa kolaborá riba nivel di Reino pa ku Enseñansa i Kultura, kual a resultá den un ‘opleidingsschool’, fondonan adishonal pa studia den region i próksimamente un fondo di Kultura. Tambe a akordá un maneho nobo di enseñansa avansá, un maneho di kultura, un kuadro pa enseñansa spesial i tambe a ofisialisá un plataforma pa stimulá siensia. A lansa trayekto piloto di skol integral pa intensifiká kolaborashon skol, pre-eskolar, skol parti atardi, mayor i bario p’asina traha riba formashon kompletu. Protokòl seguridat na skol ta den ehekushon. Pa ku Deporte a sera diferente akuerdo ku organisashonnan deportivo di bario i algun ku nos deportistanan profeshonal den eksterior pa kuida nos vèltnan i stimulá mas aktividat deportivo. A honra diferente baluarte i duna realse na nos herensia kultural na diferente okashon, komo ehèmpel e aña di ka’i orgel.

Inovashon: Kolaborashon di mas aña ku instituto sientífiko internashonal di renombre TNO, akuerdo históriko pa establesé Kòrsou komo “Living Lab” pa energia duradero den Reino Hulandes i proyekto Digital Twin huntu ku Universidat di Kòrsou.

Gubernamental: a traha dura na mehorá maneho finansiero, baha gastu gubernamental, logra mas efisiensia serka organisashonnan di/òf finansiá pa Gobièrnu i entre otro a introdusí e Rhuggenaath-norm. A reforsá institushonnan i prosesonan legislativo, manera establesementu di e sentro Karibense di Legislashon (Caribbean Center for Legislation) huntu ku Universidat di Kòrsou i a finalisá institushon di un Kinderombudsman komo promé den Karibe Hulandes.

Salubridat i Medio-Ambiente: Despues di un trayekto intensivo a realisá apertura di nos Hospital Nobo, a kanalisá reformanan den nos sistema di salúbridat i a ehekutá proyektonan dirigí riba prevenshon. Na mes momento a kuminsa ku ehekushon di maneho di oséano.

Riba tereno internashonal, Rhuggenaath a sa di pone Kòrsou riba mapa na varios okashon dor di fortifiká lasonan ku paisnan den region, manera Colombia, Panama i Merka, i ku organisashonnan internashonal manera Nashonnan Uní, Organisashon di Estadonan Merikano i Caricom. Un punto di enfoke tambe tabata pa Kòrsou fortifiká su relashon ku Union Oropeo i implementá proyektonan di desaroyo. Minister-presidènt Rhuggenaath a ser elegí i a presidensia e Asosiashon di Teritorionan i Paisnan ultramar (OCTA) di 2018 – 2020 durante kua a traha pa fortalesé e kontakto i kolaborashon entre e paisnan miembro, engrandesé e visibilidat di OCTA entre otro pa medio di partisipashon na foronan Oropeo i internashonal i lansa estudionan pa ku temanan relatá na energia, programanan di Union Oropeo, oséano/‘Blue Economy’ i migrashon.

Algun di e momentunan mas memorabel pa Minister-Presidènt Rhuggenaath ta bishitanan i enkuentronan ku suidadanonan kaminda por a interkambiá riba varios tópiko. Durante su periodo komo Minister-presidènt, semper ela tene porta di Fòrti habri pa hóbennan i kontinuamente ta topa pa sostené proyektonan di hóben i interkambiá di idea pa sa kiko ta biba bou di nan. Esakinan semper ta momentunan di gran balor i inspirashon. Otro momentunan personal memorabel tabata su bishita na e monumento dediká na Martin Luther King na Washington D.C i tambe su kombersashon personal amplio ku Sekretario General di Nashonnan Uní Guterres.

Eugene Rhuggenaath ta kasa i e tin tres yu. Den su tempu liber e gusta skucha muzik i pasa tempu ta prepara su platonan preferí den kushina. Su kuminda faborito ta italiano i naturalmente un bon plato krioyo.

Send a Message to the Candidate