Entrevista Marylin Mozes

Marilyn Moses


Dr. Marilyn Moses a nase na Jan Bos (un area na Sta. Rosa) den un famia humilde di tres yu bibando den un kas di palu.

El a bai skol na Emmaschool, Punda, i komo no tabata tin sen, e mester a kana tur dia di Jan Bos via Seru Loraweg dor di Steenrijk i despues Oranjestraat pa yega Punda.

Tur dia nan tabata surpasa retonan pa sigui bai dilanti den bida. Despues Dr. Moses a bai Peter Stuyvesant College i kaba su VWO. Mirando ku e tabata semper kurioso pa investiga kon kosnan ta funshona internamente i e tabata tin hopi interes pa kuida, el a bai studia medisina na Erasmus Universiteit na Hulanda. 

Durante su estudio el a hasi su “co-schappen” na Gambia (Afrika) i hasi stage riba pediatria (dokter di kas). Un tempu despues, ku eksperensia i training riba sirugia, pediatria i ginologia, Dr. Moses a bai biba i traha na Republika Afrikano Sentral (pais di emperador/diktador Bokassa) trahando pa Kuerpo de la Pas, Embahada Merikano i asina aportando na komunidad humilde den e area. 

Despues di a pasa den dos guera sivil el a disidi ku e momentu pa bai Kòrsou bek a yega pa duna su aporte pa un miho Kòrsou.

Dr. Moses: “Hende salú, mente salú ta krea kaminda pa famia salú i barionan salú i al final un komunidat i un Kòrsou salú. Asina un pais por bai dilanti. Salubridat i Enseñansata pone bo pais bai dilanti.”
Komo dokter di kas, e trabounan ku e ta hasi ta pasobra e stima su prohimo. Den su trabou komo entre otro dokter di kas, na warda, dokter di prison i dokter di konvento di sürnan, su trayektorio ta papia pa su mes: e ta dokter di tur hende.

Saliendo di un famia humilde, sin rekursonan  finansiero, el a logra ku perseveransia i determinashon di kambia su bida i dedika su mes na su komunidat. Awor el a halsa su dedikashon riba un plano mas haltu i ta trahando pa e pashent Kòrsou.

Send a Message to the Candidate

    Sponsored by