Entrevista Suzy Camelia Römer

Suzy Camelia Römer​

Biografia di Suzy Römer: Un líder luchadó inkansabel ku pashon, konosementu, sabidoria i eksperensia pa pueblo di Korsou.

Suzy Römer (1959) ta e di shete yu di Thelma Da Costa Gomez i Boeis Römer. Su mayornan ta “much’i Otrobanda” anke mester bisa ku su wela part’i mama ta Fita Clyd, oriundo di Banda Bou. E ta un tipiko yu di tera ku tin sanger Afrikano, Indjan di Coro i di La Guaguira, Ulandes, Spaño, Frances i Hudiu Sefárdiko di Portugal.

E famia semper a forma un nukleo fuerte, tambe den tempu duro. Nan ta sostené otro bou tur sirkumstansia.

Suzy tabatin apenas 3 aña ora su tata pa motibu di salú a baha for di Refineria Shell kaminda e tabata laborá den atministrashon di krudo. Su tata a lanta un koperativa di agrikultura na Skèrpené. Ta einan e la haña amor pa agrikultura. Komo agrikultor Boeis tabata hopi inovativo. E tabata buska simia i materialnan di agrikultura for di Venezuela i siguí kursonan. Boeis a mantené su famia ku su trabou komo agrikultor . Suzy tabata bai Skèrpenè hopi ku né i tabata kompañ’e ora e tabatata entregá fruta i bèrdura den su jeep bieu na kas di su klientenan. Despues di a traha un kantidat di aña riba kunuku, Boeis a bai traha bèk komo tenedó di buki na un konosido hotel & kasino.

Thelma tabata un muhé fuerte. E bèrdadero palanka di e kas. Un muhé emansipá ku huntu ku otro muhénan di promé ora a sostené Dòktor Da Costa Gomez den su lucha pa emansipashon di nos pueblo. Thelma mes tabata presidente di credit union i miembro aktivo den movementu pa emansipashon di hende muhé. Den e edukashon ku Suzy i su rumanan a haña di nan mayornan, semper esakinan a suprayá ku kada yu mester tin un kontribushon na nos komunidat. Na kas no por tin floherá, sea bo ta studia òf bo ta bai traha. E famia ta katholiko i kreyente. Partikular ta ku Thelma a konvertí pa katholisismo despues ku 10 aña e la manté su religion komo “protestant”. Na kas semper e mayornan i e yunan tabata diskutí riba nos komunidat, inhustisia i politika. Tur yu a siña  buska informashon, analisá i formula un opinion propio. Boeis tabatata enfatiko den su ponensia ku e no ta kria yu sumiso, ma hende ku ta pensa pa nan mes. No tabatatin tópiko ku nan no tabata diskutí. Na no konosén tópiko tabu. Mayoria di e rumannan di Suzy ta musikal manera e tata i /òf artisiko i ta pinta manera e mama.  Ambos mayor tabata eskritor di poema i Suzy tin ruman ku a públika diferente buki, ta toka guitara i piano i ta pinta masha bon.

Boeis tabata konta di su hubentut na skol, komo bòksdo na Aruba i di e atardinan ameno na kas di su mayornan kaminda nan tabata toka, kanta i disfrutá di musika. Thelma tabata konta di bida na kunuki komo mucha serka su mama i den siman na Otrobanda den kaya grandi, kaminda e la lanta serka un Tio i esaki su kasa pa e por a bai Wilhelmina school na Punda.

Hopi djadumingu Suzy i su primunan tabata pasa na kas di nan wela paterno Machi Po den Fergunsonstraat. Papa Maiku su kasa, manera nan tabata yama Michiel. M.  Römer, tabata un gran maestro di skol, konosí bou e nòmber partikular “Señor Meneer”. Ta p’e nan a yama Römerschool. Komo yu di un Venezolana, e la traha i biba aña 10 na Venezuela, kaminda Suzy tin diferente prima i primu ta biba.

Suzy tabata un mucha un poko timido pa papia ku hende ku e no konosé. E no ta un hende familiar. Ora su pia kue tera si, e ta gusta papia! E tin un karakter serio i for di chikí tabata gusta lesa masha hopi mes.  Komo ku su rumannan tabata mas grandi i tabata bai skol kaba, Suzy a siña lesa for di nan ku apenas 5 aña. Na skol semper e tabatin un bon raport. E tabata gusta bai skol i topa ku su amiganan. Solemente e no a gusta den e di 4 klas di skol basiko, kaminda e tabata haña “straf” paso e ta kaba lihé ku e enkargonan den lès, i e maestro tabata pon’é sinta ketu.

Tabata hopi duru p’e ora su Ttataata a bira hopi malu i a keda un aña den hospital promé ku el a e muri di kanker.  Ora e la fayesé Suzy a kaba di kumplí 15 aña. Su bida a kambia pa semper. E famia mester a sali for otro durante malesa di e tata, paso e mayornan a bai Colombia pa buska salú di e tata. Suzy a keda na kas di un famia i e rumanan mas grandi a keda na kas.  Te awe e ta kòrda kon a prepará kas ku ilushon pa pasa pasku di nasementu huntu ora su mayornan a yega desèmber for di Colombia, pa 23 di desèmber tog e tata drenta bèk den hospital i fayesé 2 luna despues. E morto aki tabatin un empakto emoshonal grandi. Na mes momentu finansieramente ya ku e entrada di e tata a kai afó i e famia mester a biba di un penshun chikí. Su mama a bira viuda I keda ku ainda 4 yu pa e só lanta. Su rumanan ohochí a bai traha despues di kaba skol. Un a bira polis, i un a bai traha na banko pa studia i bira abogado despues. Un otro ruman a bai Ulanda biba serka un ruman mas grandi I a studia lei. Nan no tabatin hopi material, pero si hopi amor.

Despues di kaba skol sekundario (VWO) na PSC, Suzy a bai Ulanda pa studia lei, un studio ku e la gusta masha tantu. Komo studiante Suzy a bira koleborador na e departamentu di studio, i despues di su studio e la bira dosente Universitario na Fakultat di Lei na Groningen.

Suzy semper tabata tin un karakter hopi fuerte. Nunka e no por a mira inhustisia. Asina na skol basiko e la rabia ku un maestro ku a diskriminá algun mucha, sali bai serka e kabes di skol bai reklamá. Na skol sekundario e no tabata ta akseptá ora e maestro ku forsá un opinion si base. Masha hopi biaha e la pega pa e motibu ei ku algun dosente i nan tabata sak”e for di klas. Ironia di bida ta ku netamente e karakter fuerte i persistente a sali di bon den su estudio i trabounan ku e la ehersé despues komo abogado, den sector privá i komo politiko. Suzy a sirbí komunidat komo minister di hustisia na 1992 te 1994 ku apenas 33 aña di bida i a bira minister president ku 35 aña. Despues e la bai parlamento 4 aña i tabata na mes momentu den Konseho Insular di Kòrsou. Na 1998 e la bira minister president di Antia pa di dos biaha di un koalishon di 8 partido riba 5 isla. Despues e la bira minister di ekonomia te ku 2002. Suzy a sali for di politika i bai traha komo konsehero huridiko den diferente kompania I pa gobièrnu, den su propio kompania te ku 2015 ku e la ira minister di Trafiko, Transporte i Planifikashon Urbano. Einan e la drenta polítika bèk i despues a asumí na 2017 e responsabilidat di minister di Salú, Mediambiente i Naturalesa. Suzy ta konosí pa su seriedat den gobernashon, su konosementu I forsa di akshon.

Esaki ta lokual algun di su rumannan ta bisa di dje:

Myra:

“Humildé, ma e no ta laga niun hende trapé. Semper e ta buska pa yuda esnan den mester. Kompashon i pordoná, ma semper strait den su akshonnan.”

Marius:

“Suzy ta nos ruman di mas chikí riba kual nos ta super orguyoso. Suus for di chikí semper a resaltá na skol i semper ta kla pa yuda hende. Ya for di hóben e la okupá e puestonan di mas haltu den nos komunidat ku amor i sabidoria. Suus bendishon di Dios pa Kòrsou.”

Herbert:

Kuidadoso, stima su famia i ku rèspèt pa tur hende. Kontra di inhustisia, abusu i forsanan negativo. Wowo pa tur situashon i ku solushonnan balansá i hustu. Un lider semper na vanguardia di su pueblo. Sabi, humilde i desisdido i ku Fe den Dios!”

Oscar:

“Un hende humilde, honesto, sabi i ku kurason pa hustisia. Integro i ku kompashon pa esnan vulnerable. Spiritual i ku perseveransia. Guerero den polítika, ku ta inspira i trese speransa.”

Send a Message to the Candidate

    Sponsored by